Eitt arbeiðslív í broyting
John byrjaði á Tjóðskjalasavninum í oktober 1976. Tá varð hann settur í starv sum skjalahjálpari, og síðani hevur hann røkt ein stóran og fjølbroyttan part av kjarnuuppgávunum á stovninum. Hann hevur gjørt yvirlit, skrásett skjalasavnstilfar, tikið ímóti avhendingum og havt umsjón við lesistovuni. Eisini hevur hann vegleitt og ráðgivið stovnum og undirvíst.
Við hesum hevur John arbeitt við fleiri av teimum grundleggjandi uppgávunum, sum hoyra einum skjalasavni til.
Skjalasavnsøkið er nógv broytt, síðan John byrjaði í 1976. Nýggir arbeiðshættir og broytt krøv hava gjørt støðuga fakliga menning neyðuga. Í 1980-árunum tók John útbúgving innan skjalasavns- og skrivstovuarbeiði, og seinni fekk hann starvsheitini skjalavørður og serfrøðingur.
Gjøgnum 50 ár hevur John bæði upplivað og verið við til at mynda menningina á Tjóðskjalasavninum. Starvsfelagar eru komnir og farnir, leiðslur eru skiftar, og arbeiðshættirnir hava ment seg. Hann hevur starvast undir trimum av teimum fýra landsskjalavørðunum, sum hava staðið á odda fyri Tjóðskjalasavninum gjøgnum nærum 95 ár.
Ein nýggjur kapittul
Hálv øld á sama arbeiðsplássi er eitt sjáldsamt starvsavrik og ein týðandi partur av søgu stovnsins. Hátíðarløtan 2. oktober var tí ikki bert ein fráfaringarløta, men eisini eitt høvi at steðga á og líta aftur á eitt sjáldsama langt og fjølbroytt arbeiðslív. Eftir 50 ár á Tjóðskjalasavninum setur John Kjær nú punktum fyri starvslívið á stovninum og byrjar ein nýggjan kapittul.
Leiðsla og starvsfólk á Tjóðskjalasavninum takka John fyri hansara stóra íkast gjøgnum 50 ár og ynskja honum góðan byr og alt tað besta framyvir.
