Samstarv um lesistovu í miðbýnum

Býarbókasavnið og Tjóðskjalasavnið fara nú at royna felags lesistovu í hølunum hjá Býarbókasavninum í miðbýnum.

Býarbókasavnið og Tjóðskjalasavnið fara nú at royna felags lesistovu í hølunum hjá Býarbókasavninum í miðbýnum. Væntandi letur felags lesistovan upp í februar 2022.

Heðin Mortensen, borgarstjóri og Sámal Tróndur F. Johansen, stjóri á Tjóðskjalasavninum, skrivaðu herfyri undir sáttmála partanna millum.

Fyri Tjóðskjalasavnið eru fleiri fyrimunir við felags lesistovu í miðbýnum. Ein teirra er, at hesin partur av virksemi Tjóðskjalasavnsins gerst meira sjónligur í almenna rúminum. Ein annar, at lesistovan verður meira atkomulig fyri øll, eisini fyri fólki við rørslutarni.

Umframt felags lesistovu, verður eisini møguleiki, at hava smærri framsýningar, grundaðar á skjalatilfar, sum finst á goymslum Tjóðskjalasavnsins, t.d. søgur úr Havn.

Deil hesi tíðindi:

Facebook
LinkedIn
Teldupost

Onnur tíðindi

Átta nøvn, átta mannalív

Allahalgannadag minnast vit tey, ið andaðist á sjónum. Summi minnast vit sjálvi. Vit minnast eitt andlit, eina rødd ella eina hending. Onnur kenna vit bara úr frásagnum, myndum og nøvnum. Og so eru tey, sum eingin livandi longur minnist.

Tó eru spor eftir teimum.

Eitt navn í einari kirkjubók. Eitt húski í einari fólkateljing. Ein ogn í einum skifti. Smá brot av einum mannalívi, sum varð livað fyri langari tíð síðan.

Í dag, allahalgannadag, venda vit okkum móti einum slíkum broti úr føroyskari søgu.

Les meiri

Altjóða Sálarheilsudagur 10 oktobur 2026

Í 1903 varð ein ung føroysk lærarinna, sum var álvarsliga sálarsjúk, send til viðgerðar á sinnissjúkrahúsið Oringe í Vordingborg í Danmark. Hon kom ongantíð aftur til Føroyar. Eftir meira enn hálva øld á donskum stovnum doyði hon á einum røktarheimi í 1957.
Í dag hevði sjúklingajournal hennara verið ein týdningarmikil kelda til at skilja bæði lív hennara, sjúkuna og tær umstøður, hon livdi undir. Sjúklingajournalirnar vórðu mettar sum donsk skjøl og varðveittar í Danmark sambært danskari skjalasavnslóg. Tí vóru tær eisini fevndar av donskum kassatiónsreglum. Journalin er ikki til longur, tí hon er burturbeind sambært hesum reglum.
Lagnan hjá hesi kvinnu er eitt dømi um, hvussu danskur kassatiónspolitikkur hevur ávirkað føroyska søgu og gransking.

Les meiri