Broytingarráðstevna Australia

Eyðkenni við ICA-ráðstevnuni í ár var broyting. Flest allar framløgur á ráðstevnuni og nærum øll kjak snúði seg um, hvussu skjalasøvn kring heimin kunnu lofta teimum stóru avbjóðingum, sum broytingar í politikki, tøkni, mentan, fyrisiting, búskapi og veðurlagi seta teimum.
Flest øll vóru samd um, at broyting og nýhugsan er neyðug. ‘Business as usual’ er ein farin søga. Øll skjalasøvn verða noydd at halda eyga við, hvat gongur fyri rundan um tey, og spyrja seg sjálvan, um tað tey sjálvi gera er tað rætta, og um tað er nóg gott.